Молитвы святым мученикам пяточисленным (Евстратию, Авксентию, Евгению, Мардарию и Оресту)

Житие святых

Тропарь, глас 4

Мученик всечестных светлость, пяточисленных страстотерпцев воспоем, славу земных презревших, солнца светлаго Евстратия, премудраго витию со страдальцы, на огнь и муки дерзнувших за всех Царя Христа и от Престола Того славы почестьми венцев обдаренных. Тех молитвами, Христе Боже, спаси души наша.

Кондак мучеников Евстратия и иже с ним, глас 2

Светильник явился еси светлейший, во тьме неведения седящим, страстотерпче: верою, бо яко копием, обложився, врагов шатания не убоялся еси Евстратие, риторов сый благоязычнейший.

Кондак мучеников Евстратия и иже с ним, глас 3

Витийствуя пред пребеззаконнующими божественная, биения претерпел еси мужественнейшим сердцем, облистал еси богознаменьми пречудне, угасил еси возвышенный прелести пламень. Сего ради тя чествуем всеблаженне мучениче Христов Евстратие.

Тропарь мученику Евгению, глас 4

Мученик Твой, Господи, Евгений, во страдании своем венец прият нетленный от Тебе, Бога нашего; имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Кондак мученику Евгению, глас 2

Звезда светлая явился еси, непрелестная мирови, Солнца Христа возвещающи зарями твоими, страстотерпче Евгение, и прелесть погасил еси всю: нам же подаеши свет, моляся непрестанно о всех нас.

Величание мученику Евгению

Величаем тя, святителю отче Евгение, и чтим святую память твою, ты бо молиши за нас Христа Бога нашего.